Еще молимся Тебе, Господу Богу нашему, о еже услышатися гласу моления нашего и молитве и помиловати жителей градов и весей Отечества нашего от злой воли и действа человек, во озлоблении бесовстем пребывающих, и сохранити их невредимых и непреоборимых от всех козней диавольских и всякого злаго обстояния, подати же им здравие с долгоденствием, рцем вси Господи, услыши и помилуй.

Не хотяй смерти грешных, но еже обратитися, и живым им быти, пощади и помилуй болящих рабов Твоих, ураненных от злой воли человек, в помрачении ума пребывающих, исцели болезни, уврачуй страсти душ и телес страждущих рабов Твоих, и якоже Иаирову дщерь от одра болезни воздвигни и здравых сотвори, молим Ти ся, милосердый Господи, услыши и помилуй.

Устроивый мир сей во славу Твою, о еже любити вся творения его божественная, сотвори да и противящиеся Истине Твоей и во озлоблении пребывающия, паки к Тебе да обратятся и истинную веру и любовь да исповедят, молим Ти ся Всесильный Творче, услыши и помилуй.

Не хотяй смерти грешных, но ожидаяй их обращения и покаяния, умири умы и сердца неверием и ожесточением помраченныя, да познают Тебе истиннаго Бога и в правоверии да укрепятся, молим Ти ся Вседаровитый Господи, услыши и помилуй.

Давый заповедь Твою нам, еже любити Тебе Бога нашего и ближняго своего, сотвори, да ненависти, вражды, обиды, мздоимства и прочая беззакония прекратятся, истинная же любовь да царствует в сердцах наших, молим Ти ся, Спасителю наш, услыши и милостивно помилуй.