О, приснославнии Христовы праведницы, святии богоотцы Иоакиме и Анно, предстоящии Небесному Престолу великаго Царя и велие дерзновение к Нему имущии, яко от предблагословенныя дщери вашея Пречистыя Богородицы и Приснодевы Марии воплотися изволившему, к вам, яко многомощным предстателем и усердным о нас молитвенникам прибегаем мы, грешнии и недостойнии. Молите благость его, яко да отвратит от нас гнев Свой, по делом нашим праведно на ны движимый, и да безчисленныя прегрешения наша презрев, обратит нас на путь покаяния и на стезе заповедей Своих да утвердит нас. Таже молитвами вашими в мир живот наш сохраните и во всех благих благое поспешение испросите, вся яже к животу и благочестию потребная нам от Бога дарующе, от всяких напастей, и бед, и от всех враг видимых и невидимых защищающе, яко да тихое и безмолвное житие поживем во всяком благочестии и чистоте, и тако в мире временное сие житие прешедшее в вечный достигнем покой, идеже вашим святым умолением да сподобимся Небеснаго Царствия Христа Бога нашего, Ему же со Отцем и Пресвятым Духом подобает всякая слава и поклонение во веки веков. Аминь.

Иже в законней благодати праведни бывше, Младенца Богоданного породиша нам, Иоакиме и Анно. Темже днесь светло торжествует, весело празднующи, Божественная церковь честную вашу память, славящи и Бога, воздвигшаго рог спасения нам в доме Давидове.

Господи, молитвами Богоотца Иоакима и Анны разреши от неплодства рабы твоя (имя ) и подай чадо, да воспитаем в вере Православной для жизни вечной.

Да будет воля Твоя святая. Аминь.