Приими, о Всеблагословенная и Всемощная Госпоже Владычице Богородице Дево, сия молитвы, со слезами Тебе ныне приносимыя от нас недостойных раб Твоих ко Твоему цельбоносному Образу пение возсылающих со умилением, яко Тебе самой зде Сущей и внемлющей молению нашему.
По коемуждо бо прошению исполнение твориши, скорби облегчаеши, немощным здравие даруеши, расслабленныя и недужная исцеляеши, от бесных бесы прогоняеши, обидимыя от обид избавляеши, прокаженныя очищаеши и малыя дети милуеши; еще же Госпоже Владычице Богородице, и от уз и темниц освобождаеши и всякия многоразличныя страсти врачуеши; вся бо суть возможна ходатайством Твоим к Сыну Твоему, Христу Богу нашему.
О Вспепетая Мати, Пресвятая Богородице!
Не переставай молитися о нас недостойных рабах Твоих, славящих Тя и почитающих Тя, и поклоняющихся со умилением Пречистому Образу Твоему, и надежду имущих невозвратну и веру несумненну к Тебе, Приснодеве Преславней и Непорочней, ныне и присно и во веки веков. Аминь.
_____________________________________________
Не имамы иные помощи, не имамы иные надежды, разве Тебе Владычице, Ты нам помози: на Тебя надеемся, и Тобою хвалимся; Твои бо есмь рабы, да не постыдимся.
